چیو هیلمه‌د وه‌یره بچی
شعر از رضا جمشیدی
ته‌مام ئه‌زره‌ته‌یله‌گه‌م
خه‌وَ خوه‌ش خه‌وه‌یله‌گه‌م
ده‌ردد وه ناو چه‌وه‌یله‌گه‌م
هه‌ساره‌گه‌ی شه‌وه یله‌گه‌م
چیو هیلمه‌د وه‌یره بچی
تو هه‌ور ئاسمان که‌وی
تو نه‌قش قالی و نه‌وی
تاج سه‌ری نیور چه‌وی
ئه‌روسه‌گه‌ی مانگه شه‌وی
چیو هیلمه‌د وه‌یره بچی
واران ناز ناو وه‌هار
ته‌ک داره‌گه‌ی ناو سه‌وزه زار
بالا بلین وینه‌ی چنار
قرمزی میوه ی هه نار
چیو هیلمه‌د وه‌یره بچی
شکوفه‌گه‌ی قه‌ی داره‌گان
نازاره‌گه‌ی ناو مالمان
گه‌ورا تره‌ک وه ئاسمان
چه‌و مه‌سه گه‌ی شیرین زوان
چیو هیلمه‌د وه‌یره بچی
په‌روانه‌گه‌ی هه‌فتا و دو رنگ
قه‌شه‌نگ تر ئه‌و هه‌ر چی قه‌شه‌نگ
شیرین و ناز و شوخ و شه‌نگ
دنیا وه سه‌ر تو هاله جه‌نگ
چیو هیلمه‌د وه‌یره بچی
تو نیور نیور مالمی
تو روژ و مانگ و سالمی
هه‌نار و پرتقالمی
هه‌والگر هه‌والمی
چیو هیلمه‌د وه‌یره بچی
به‌رزی به رز بان په‌راو
تاف زلال ناو سراو
خوه‌ش مه‌سیه‌گه‌ی جام شراو
چه‌و که‌وه‌گه‌ی ده‌یشت زهاو
چیو هیلمه‌د وه‌یره بچی
سوسه‌ن و یاس و نه‌سته‌ره‌ن
مُشک خوه‌ش ده‌یشت خُته‌ن
دیور بو له لید چه‌وه‌یل گه‌‌ن
بخه‌ن ده‌ردد وه لیم بخه‌ن
چیو هیلمه‌د وه‌یره بچی
ده‌رد دلم وه لای خوه‌ده
ده‌رد دلم ئه‌رای خوه‌ده
ده‌رد دلم وه پای خوه‌ده
ده‌رد دلم جیای خوه‌ده
چیو هیلمه‌د وه‌یره بچی
تو چیوز دار بایه‌می
تو هووریید که‌ی ئایه‌می
ته نیا تنی سه‌رمایه می
وه‌ی خوه‌ر داخه سایه‌می
چیو هیلمه‌د وه‌یره بچی
تو هه‌ر چی خوه‌زیه‌وه‌یلمی
خه‌و خوه‌ش خه‌وه‌یلمی
بینایه‌گه‌ی چه‌وه یلمی
هه‌ساره‌گه‌ی شه‌وه‌یلمی
چیو هیلمه‌د وه‌یره بچی